Шымкент қалалық сотының ұйымдастырумен жергілікті соттардың қызметін таныстыру мақсатында журналистер мен блогерлерге арналған пресс-тур өтті. Бұқаралық ақпарат құралдарының өкілдеріне алдымен сотқа кіреберістегі фронт кеңсенің жұмысы таныстырылды. Сотқа келушілерге қолайлы қызмет көрсету мақсатында жасалған фронт кеңсе заманауи стандарттарға сәйкес жарақтандырылған. Мұнда медиаторларға, адвокаттар мен прокурорға іс материалдарымен танысуына арналған кабинеттер бар.
Шымкент қаласы бойынша Соттар әкімшісінің басшысы Берік Мейірханов сот жүйесінде қолданысқа енгізілген электрондық-ақпараттық технологиялар мен сервистердің қалалық сотта қалай жұмыс істейтінін көрсетіп, сот мәжіліс залдарын аралатып шықты.
Сот процесін бастан-аяқ аудио-бейнетіркеуге түсіретін АБТ-ның жұмыс барысын таныстырды. Сонымен қатар, сотқа қалай электронды өтініш беріп, сот процесіне қашықтықтан қалай қатысуға және сотқа келмей-ақ сот актісін қалай алуға болатынын, тағы басқа да жаңа технологиялардың мүмкіндіктері іс жүзінде көрсетілді.
Қалалық соттағы «Қабылдау орталығында» басшылардың азаматтарды қабылдап, ашық жағдайда әңгімелесуге ыңғай-ластырылған. Сотқа келген азаматтарға қолайлы жағдай жасау мақсатында жаңа орталық сот ғимаратының бірінші қабатында кірген жерде фойеде орналасқан. Мұнда алдын ала жазылу бойынша, белгіленген уақытта, сот төрағасы, азаматтық және қылмыстық істер жөніндегі сот алқаларының төрағалары, Соттар әкімшісінің басшысы және тағы басқалар азаматтарды қабылдайды.
Одан кейін, қонақтарға сот жүйесінің қалыптасу, даму жолы туралы мағұламаттар және сот саласында қызмет атқарған танымал тұлғалар жөнінде деректер қоры жиналған мұражаймен және кітапхана жұмысымен бөлім басшысы Қабыл Дүйсенби таныстырып өтті.
Пресс-тур «Ақпарат орталығында» жалғасып, қалалық соттың алқа төрағасы Ербол Жанғазин, БАҚ-пен өзара іс-қимылды үйлестіруші судьялары Самат Мырзахметов пен Виталий Мирошников және Берік Мейірханов сот пен қоғамның коммуникациялық мәселелері жөнінде ақпарат берді.
Іс-шара соңында, журналистер мен сот қызметкерлері соттағы «Еркін аймақ» алаңында өзара пікір алмасып, ойларын ортаға салды.
Шымкент қалалық сотының баспасөз қызметі
