Шымкент қалалық сотында төраға Е.Рахымбековтің қатысуымен 2021 жылдың 1 шілдесінен қолданысқа енетін «Қазақстан Республикасының Əкімшілік рəсімдік-процестік кодексінің» негізгі ережелерін жергілікті атқару органдарының басшыларына түсіндіру мақсатында кездесу өтті. Оған қала, аудан əкімдері мен барлық басқарма басшылары жəне жергілікті бұқаралық ақпарат құралдарының өкілдері қатысты.
Жиынды төраға Е.Рахымбеков ашып: «Бұған дейін де қала, аудан əкімдері аппаратының жəне басқармаларының мамандарына арнайы семинар өткізіліп, оларға жаңа кодекстің ережелері жан-жақты түсіндірілген болатын. Бұл тақырып өзекті болғандықтан, қала жəне аудан əкімдіктерінің басшыларын шақырып отырмыз. Бүгінгі заман талабына сай əкімшілік əділет институтын қаламызда сапалы енгізу бəріміздің басты міндетіміз» – деді. Шымкент қалалық сотының судьясы Г.Қыдырбаева «Əкімшілік Əділетті құру мəселесіне» тоқталды. Кодекс күшіне енетін 1 шілдеден бастап елімізде, соның ішінде Шымкентте де, мамандандырылған Əкімшілік сот жұмысына кіріседі. Ал, қазіргі əкімшілік сот «Мамандандырылған əкімшілік құқық бұзушылық соты» болып атауы өзгеріп, бұрынғысынша жұмысын жалғастырады.
Əкімшілік сотта азаматтар, заңды тұлғалар мен мемлекеттік органдардың арасында туындаған жария-құқықтық даулар бойынша əкімшілік істерді қарайтын болады. Əкімшілік соттың өзге соттардан басты айырмашылығы – азаматтардың құқығын қорғауға баса мəн берілуінде жəне судьяның белсенді əрекет етуінде екендігін айтты. Шымкент қаласының мамандандырылған əкімшілік сотының судьясы А.Бекназаров Қазақстан Республикасының Əкімшілік рəсімдік-процестік кодексінің ерекшеліктері туралы тарқатып айтып, əрбір тарауына жеке тоқталып өтті.
Ал, Шымкент қаласының əл-Фараби аудандық сотының судьясы М.Қалмұрзаева баяндама жасап, əкімшілік істерді соттылығы бойынша жіктеудің талаптарын, сот процесіне қатысатын тараптардың құқықтары мен міндеттерін түсіндіріп берді. Кездесуді қорыта келе, Е.Рахымбеков: – жаңа заң азаматтардың құқықтарын қорғауға бағытталғандықтан, оның нəтижелі болуы халықтың мемлекеттің атқарушы билігі мен сот жүйесіне деген сенімін арттыратын болады. Алдағы уақытта қалалық соттың ұйымдастырумен жаңа кодекстің ережелерін түсіндіру бойынша семинар маусым айына дейін жалғасады – деді төраға. Жиын соңында əкімдердің қойған сұрақтарына судьялар жауап берді.
Halyqmediatory ақпарат.
