Қарым-қатынастағы жігіттің басты қасиеті – әйел үшін өзгеруге бейімдігі. Егер ер адам өзгере алмаса, өзгеруге дайын болмаса, қарым-қатынасқа дайын болмағаны. Қарым-қатынасқа жарамсыз.
Жасөспірімдік психологиядан өспей қалған еркектер насихаттайтын бүтін бір идеология бар. «Әйелмен келісу – оған бағыну деген сөз. Тек қатынжанды еркектер бағынады. Әйелді бастан. Басынан қатал ұстау керек. Әйелдер билеп-төстейтін, авторитарлы, қатал еркектерді жақсы көреді. Оған еш нәрседе жол берме. Қысым жаса, бақыр, қорқыт – сонда нағыз еркек боласың, нағыз альфа-еркек атанасың» дейтіндер бар. Құмсалғыштың ішінде ойнап отырған бала-шағаның ортасында альфа-еркек атану оңай, әрине. Өзіңнен әлсіз жаратылған әйел затын қорқыту, дегеніңе көндіру оңай. Бәлкім, көртышқан сатып алып, өзіңе Киелі Рейх жасап аларсың? Мұндайға күлкім келеді.
Неге еркек өзгеруі керек?
Себебі, бұл әлсіздерді қорғайтын мықтылардың өмірлік ұстанымы. Әлсіздерге қоқан-лоққы көрсетіп, кемсіту мен қысым жасау зорлық-зомбылық деп аталады. Сүйекке таңба. Мықтылармен байланысуға бейімсіз қорқақтардың әрекеті.
Мықты азамат әйелі мен балаларын сыйлайды, құрметтейді, оларға қамқор болады. Қамқорлық жасау үшін өзгеруге тура келеді.
Егер адам ит сатып алса, ертеңді-кеш оны сыртқа шығаруы тиіс. Өзіне баулуы, мал дәрігеріне көрсетуі, дұрыс тамақтануын қадағалауы керек. Ерекше зейін бөлесің. Күн тәртібің өзгереді. Иттің мінез-құлқын зерттейсің. Қолыңа түскеннің бәрі де сол… Көлік, мотоцикл…
Әйел – ерекше, нәзік нысан. Ол ит емес. Тіпті мотоцикл де емес. Әйелге уақыт пен күш-қайратың көбірек кетеді. Оның психологиясын зерттеуіңе әлдеқайда көп уақыт кетеді. Мұның бәрі сені өзгертеді. Әдеткі күн тәртібіңді өзгертесің. Бұрынғының бәрі жарамсыз болады. Бойдақ күнгі ережелер қоқысқа кетеді. Өміріңе әйелді енгізіп, оған уақыт бөлмей қоятын болсаң, ит сатып алып, оған тамақ бермей қойғандай ма? Сонда сен қандай адамсың?
Ал отбасы құру үшін ниет бүтін болу қажет. Ер азамат қаржылай да, психологиялық тұрғыда да дайын болуы тиіс. Азамат атануы керек. Азамат деген өзінің өзімшілдігін ет жақыны үшін аяқ асты етуге дайын адам. Сондықтан нағыз азамат – әйел үшін өзгеруге бейімді адам. Махаббат үшін өзгеретін адам.
«Қыздар үшін өзгермейміз» деп есеймеген ұлдар айғайласа да, сабырлы ер жігіттер: еркек деген өзінің ет жақынына қамқор болатын азамат екенін біледі. Қамқор болу – өзгеруге бейімді болу деген сөз.
Аударған Шынар Әбілдә
